Morgunblaðið fjallaði um Kærleikskorn og birti mynd af Jane Telephonda-hreyfingunni í öllu sínu veldi á baksíðunni sunnudaginn 18. október 2026.
Myndin var tekin í Laugardalnum og á henni sést hesturinn taka ákveðið á rás í áttina að Húsdýragarðinum, eins og hann viti hvert hann sé að fara. Hugsanlega hefur hann runnið á lyktina af örvæntingarfullum bræðrum sínum og systrum í þessari óhugnanlegu dýraprísund Reykjavíkurborgar sem garðurinn er.
Önnur platan okkar á árinu 2026, Kærleikskorn, er komin út.
Á henni eru 16 lög af Boson of Love og We Are the Music, í glænýjum íslenskum búningi. Þar með má segja að íslenskuvæðing Jane Telephonda-hreyfingarinnar sé fullkomnuð, eða því sem næst.
Nýju textarnir eru eftir Albert Þorbergsson gítarleikara (Kærleikskorn, Hátt á lofti, Ljósadýr, Ég óttast aldrei og Hátt látt' í þér heyra), Ásdísi Rósu Þórðardóttur söngkonu (Beiskjan, Líf er ást), Grétar Má Ólafsson hljómborðsleikara (Veiðiferð, Prestakall), Hólmstein Inga Halldórsson trommuleikara (Horfðu í spegilinn, Umlukin ljósinu), Pétur Þór Sigurðsson gítarleikara (Skrekkurinn), Rafn Jóhannesson píanóleikara (Sleppum takinu) og Ívar Pál Jónsson gítarleikara (Komdu með mér, Já Rósa, Senefelderplatz).
Lagalistinn Kærleikskorns:
Sjálfur doktorinn, Arnar Eggert Thoroddsen, hefur kveðið upp dóm sinn um nýju plötuna okkar:
„Tónlistin er yndisleg en Ívar hefur mjög svo náttúrulega lagasmíðataug eins og ég hef vikið að. Má ég kalla þetta Bowie-legar smíðar með dassi af Cardigans? Já, ég held ég megi það alveg. Ívar er með sinn stíl, hann er nýbylgjuhundur, en innan þess skapalóns eru tilbrigði.
Sum lögin eru undurfurðuleg og sprellkennd, sum í klassísku varðeldaformi, önnur með ævintýralegum hljómagangi. Og sum stingandi falleg.“
Faglegri og endanlegri verður stimpillinn ekki, frá helsta fræðimanni tónlistarheimsins. Við þökkum auðmjúk fyrir okkur.
Við greindum frá innri og ytri málefnum Jane Telephonda-hreyfingarinnar í viðtali við Orra Pál hjá Sunnudagsmogganum 12. apríl. Gefum Orra orðið:
„Það er enginn óður til gjöreyðingar á þessari plötu, vonandi frekar í hina áttina. Uppleggið hjá okkur er gleði; við erum að fagna lífinu, kærleikanum og voninni,“ segir Ívar Páll Jónsson, forsprakki indírokksveitarinnar Jane Telephonda, um plötuna Samhengið sem kom út í vikunni. Eiginkona hans, Ásdís Rósa Þórðardóttir, söngkona Jane Telephonda, tekur heilshugar undir þetta. Gleðin og vináttan hafi alltaf ráðið för við tónsköpun sveitarinnar.
Þau segja lífið ekki þurfa að vera flókið. „Gerum eitthvað algjörlega frábært á hverjum degi og þá gerist eitthvað uppbyggilegt og gott,“ bætir Ívar Páll við og vísar þar í upphafslag plötunnar sem einmitt heitir Gerum eitthvað algjörlega frábært. Þar segir:
Gerum eitthvað algjörlega frábært,
fyrir aðra,
fyrir okkur,
fyrir börnin,
fyrir okkur sjálf,
fyrir heiminn
sem við eigum
því að lífið
kemur okkur þá
óforvarandis
í opna skjöldu
Hægt er að lesa viðtalið í heild sinni með því að smella á myndina hér fyrir ofan.